is rah-e-mohabbat mein to aazar mile hain

is rāh-e-mohabbat meñ to āzār mile haiñ

phūloñ kī tamannā thī magar ḳhaar mile haiñ

anmol jo insāñ thā vo kauḌī meñ bikā hai

duniyā ke ka.ī aise bhī bāzār mile haiñ

jis ne bhī mujhe dekhā hai patthar se navāzā

vo kaun haiñ phūloñ ke jinheñ haar mile haiñ

mālik ye diyā aaj havāoñ se bachānā

mausam hai ajab āñdhī ke āsār mile haiñ

duniyā meñ faqat ek zuleḳhā hī nahīñ thī

har yūsuf-e-sānī ke ḳharīdār mile haiñ

ab un ke na milne kī shikāyat na gila hai

ham jab bhī mile ḳhud se to be-zār mile haiñ

'nāsir' ye tamannā thī mohabbat se mileñge

vo jab bhī mile bar-sar-e-paikār mile haiñ

is rah-e-mohabbat mein to aazar mile hain

phulon ki tamanna thi magar KHar mile hain

anmol jo insan tha wo kauDi mein bika hai

duniya ke kai aise bhi bazar mile hain

jis ne bhi mujhe dekha hai patthar se nawaza

wo kaun hain phulon ke jinhen haar mile hain

malik ye diya aaj hawaon se bachana

mausam hai ajab aandhi ke aasar mile hain

duniya mein faqat ek zuleKHa hi nahin thi

har yusuf-e-sani ke KHaridar mile hain

ab un ke na milne ki shikayat na gila hai

hum jab bhi mile KHud se to be-zar mile hain

'nasir' ye tamanna thi mohabbat se milenge

wo jab bhi mile bar-sar-e-paikar mile hain