is tarah paikar-e-wafa ho jaen

is tarah paikar-e-vafā ho jaa.eñ

ek duuje kā aasrā ho jaa.eñ

aao mil baiTh kar hañseñ boleñ

nahīñ mā’lūm kab judā ho jaa.eñ

dukh kisī ko ho ham taḌap uTTheñ

is qadar dard-āshnā ho jaa.eñ

ḳhushk dhartī chaTaḳh rahī ho jab

bharī barsāt kī ghaTā ho jaa.eñ

shahr jāmid hai log be-āvāz

aise māhaul meñ sadā ho jaa.eñ

dushmanoñ ke liye baneñ sarsar

dostoñ ke liye sabā ho jaa.eñ

jo hameñ dekhe dekh le ḳhud ko

sar-ba-sar sat.h-e-ā.ina ho jaa.eñ

aag dil kī agar bhaḌak uTThe

ye dhuñdlake sahar-numā ho jaa.eñ

rañg-e-ālam badal rahā hai 'hazīñ'

nahīñ mā’lūm kyā se kyā ho jaa.eñ

is tarah paikar-e-wafa ho jaen

ek duje ka aasra ho jaen

aao mil baiTh kar hansen bolen

nahin ma’lum kab juda ho jaen

dukh kisi ko ho hum taDap uTThen

is qadar dard-ashna ho jaen

KHushk dharti chaTaKH rahi ho jab

bhari barsat ki ghaTa ho jaen

shahr jamid hai log be-awaz

aise mahaul mein sada ho jaen

dushmanon ke liye banen sarsar

doston ke liye saba ho jaen

jo hamein dekhe dekh le KHud ko

sar-ba-sar sath-e-aina ho jaen

aag dil ki agar bhaDak uTThe

ye dhundlake sahar-numa ho jaen

rang-e-alam badal raha hai 'hazin'

nahin ma’lum kya se kya ho jaen