ishq hun jurat-e-izhaar bhi kar sakta hun

ishq huuñ jur.at-e-iz.hār bhī kar saktā huuñ

ḳhud ko rusvā sar-e-bāzār bhī kar saktā huuñ

tū samajhtā hai ki maiñ kuchh bhī nahīñ tere baġhair

maiñ tire pyaar se inkār bhī kar saktā huuñ

ġhair mumkin hī sahī tujh ko bhulānā lekin

ye jo dariyā hai ise paar bhī kar saktā huuñ

tū mirī amn-pasandī ko ġhalat naam na de

vaar sahtā hī nahīñ vaar bhī kar saktā huuñ

mai-kada kār-e-digar aur janāb-e-vā.iz

aisī nekī maiñ gunahgār bhī kar saktā huuñ

dāvarā maiñ tirī duniyā meñ to ḳhāmosh rahā

par sar-e-hashr maiñ takrār bhī kar saktā huuñ

ishq hun jurat-e-izhaar bhi kar sakta hun

KHud ko ruswa sar-e-bazar bhi kar sakta hun

tu samajhta hai ki main kuchh bhi nahin tere baghair

main tere pyar se inkar bhi kar sakta hun

ghair mumkin hi sahi tujh ko bhulana lekin

ye jo dariya hai ise par bhi kar sakta hun

tu meri amn-pasandi ko ghalat nam na de

war sahta hi nahin war bhi kar sakta hun

mai-kada kar-e-digar aur janab-e-waiz

aisi neki main gunahgar bhi kar sakta hun

dawara main teri duniya mein to KHamosh raha

par sar-e-hashr main takrar bhi kar sakta hun