ishq janmon ka hai safar shayad

ishq janmoñ kā hai safar shāyad

ḳhatm hogā na umr bhar shāyad

aaj kachchā ghaḌā hai naav mirī

paar lag jā.ūñ Duub kar shāyad

harf-e-matlab sunā ke ro denā

kaam kar jaa.e chashm-e-tar shāyad

ḳhud ko ham bārhā pukār aa.e

aaj ham bhī nahīñ the ghar shāyad

aur karnī hai justujū apnī

aur phirnā hai dar-ba-dar shāyad

kaun pāgal ko kū-ba-kū DhūñDe

phir rahā ho nagar nagar shāyad

shab ga.e uTh ke yaad kar us ko

yuuñ duāoñ meñ ho asar shāyad

aa ke manzil pe so gayā raahī

ḳhatm hai bas yahīñ safar shāyad

ban sañvar kar rahā karo 'hasrat'

us kī paḌ jaa.e ik nazar shāyad

ishq janmon ka hai safar shayad

KHatm hoga na umr bhar shayad

aaj kachcha ghaDa hai naw meri

par lag jaun Dub kar shayad

harf-e-matlab suna ke ro dena

kaam kar jae chashm-e-tar shayad

KHud ko hum barha pukar aae

aaj hum bhi nahin the ghar shayad

aur karni hai justuju apni

aur phirna hai dar-ba-dar shayad

kaun pagal ko ku-ba-ku DhunDe

phir raha ho nagar nagar shayad

shab gae uTh ke yaad kar us ko

yun duaon mein ho asar shayad

aa ke manzil pe so gaya rahi

KHatm hai bas yahin safar shayad

ban sanwar kar raha karo 'hasrat'

us ki paD jae ek nazar shayad