ishq kar ke dekh li jo bebasi dekhi na thi

'ishq kar ke dekh lī jo bebasī dekhī na thī

is qadar uljhan meñ pahle zindagī dekhī na thī

ye tamāshā bhī 'ajab hai un ke uTh jaane ke baa'd

maiñ ne din meñ is se pahle tīrgī dekhī na thī

aap kyā aa.e ki ruḳhsat sab añdhere ho ga.e

is qadar ghar meñ kabhī bhī raushnī dekhī na thī

aap se āñkheñ milī thiiñ phir na jaane kyā huā

log kahte haiñ ki aisī be-ḳhudī dekhī na thī

mujh ko ruḳhsat kar rahe haiñ vo 'ajab andāz se

aañkh meñ aañsū laboñ par ye hañsī dekhī na thī

kis qadar ḳhush huuñ maiñ 'nāsir' un ko pā lene ke baa'd

aisā lagtā hai kabhī aisī ḳhushī dekhī na thī

'ishq kar ke dekh li jo bebasi dekhi na thi

is qadar uljhan mein pahle zindagi dekhi na thi

ye tamasha bhi 'ajab hai un ke uTh jaane ke ba'd

main ne din mein is se pahle tirgi dekhi na thi

aap kya aae ki ruKHsat sab andhere ho gae

is qadar ghar mein kabhi bhi raushni dekhi na thi

aap se aankhen mili thin phir na jaane kya hua

log kahte hain ki aisi be-KHudi dekhi na thi

mujh ko ruKHsat kar rahe hain wo 'ajab andaz se

aankh mein aansu labon par ye hansi dekhi na thi

kis qadar KHush hun main 'nasir' un ko pa lene ke ba'd

aisa lagta hai kabhi aisi KHushi dekhi na thi