itne be-mehr mausamon mein bhi usne had kar di mehrbani ki

itne be-mehr mausamoñ meñ bhī us ne had kar dī mehrbānī kī

kiyā mehmān mujh musāfir ko aur phir dil se mezbānī kī

us ke andāz se jhalaktā thā koī kirdār dāstānoñ kā

us kī āvāz se bikhartī thī koī ḳhushbū kisī kahānī kī

shaam ḳhāmosh thī so us ne bhī guftugū se gurez karte hue

jalte jazboñ ko rakkhā āñkhoñ meñ jism se dil kī tarjumānī kī

pahle us ne gale lagāyā aur mujh ko phir le ga.ī bahishtoñ meñ

ek baat us ne kī zamīnī sī dūsrī baat āsmānī kī

ab to hālat huī re'āyā sī ab vo tārīḳh kyā kaheñ 'ḳhāvar'

dil kī jo saltanat milī thī hameñ us pe kis kis ne hukmrānī kī

itne be-mehr mausamon mein bhi us ne had kar di mehrbani ki

kiya mehman mujh musafir ko aur phir dil se mezbani ki

us ke andaz se jhalakta tha koi kirdar dastanon ka

us ki aawaz se bikharti thi koi KHushbu kisi kahani ki

sham KHamosh thi so us ne bhi guftugu se gurez karte hue

jalte jazbon ko rakkha aankhon mein jism se dil ki tarjumani ki

pahle us ne gale lagaya aur mujh ko phir le gai bahishton mein

ek baat us ne ki zamini si dusri baat aasmani ki

ab to haalat hui re'aya si ab wo tariKH kya kahen 'KHawar'

dil ki jo saltanat mili thi hamein us pe kis kis ne hukmrani ki