izhaar-e-junun bar-sar-e-bazar hua hai

iz.hār-e-junūñ bar-sar-e-bāzār huā hai

dil dast-e-tamannā kā giraftār huā hai

behosh-e-gunah jo dil-e-bīmār huā hai

ik shauq-e-talab sā mujhe talvār huā hai

sahrā-e-tamannā meñ mirā dil tujhe pā kar

shahr-e-havas-ālūd se bezār huā hai

behosh-e-ḳhirad ko junūñ āgāh karegā

ye jazb jo āmāda-e-paikār huā hai

maiñ vasl kī shab raqs-e-ġham-āmez karūñgī

ik dard mirā ham-shab-e-bedār huā hai

is darja nasha kab hai ki gumrāh rahūñ maiñ

ye hosh mirā dushman-e-dushvār huā hai

TuuTī hai ye kashtī to mire saath safar ko

vo jān-e-masāfat mirā tayyār huā hai

is ḳhūbī-e-qismat pe mujhe naaz bahut hai

vo shaḳhs mirī jaañ kā talabgār huā hai

maiñ ā.īna-e-dil ko sar-e-ḳhvāb hī toḌūñ

is dasht-e-shanāsā kā ye isrār huā hai

kuchh kaam kab aayā hai mirā girya-e-shab bhī

isrāf-e-dil-o-jāñ mirā be-kār huā hai

izhaar-e-junun bar-sar-e-bazar hua hai

dil dast-e-tamanna ka giraftar hua hai

behosh-e-gunah jo dil-e-bimar hua hai

ek shauq-e-talab sa mujhe talwar hua hai

sahra-e-tamanna mein mera dil tujhe pa kar

shahr-e-hawas-alud se bezar hua hai

behosh-e-KHirad ko junun aagah karega

ye jazb jo aamada-e-paikar hua hai

main wasl ki shab raqs-e-gham-amez karungi

ek dard mera ham-shab-e-bedar hua hai

is darja nasha kab hai ki gumrah rahun main

ye hosh mera dushman-e-dushwar hua hai

TuTi hai ye kashti to mere sath safar ko

wo jaan-e-masafat mera tayyar hua hai

is KHubi-e-qismat pe mujhe naz bahut hai

wo shaKHs meri jaan ka talabgar hua hai

main aaina-e-dil ko sar-e-KHwab hi toDun

is dasht-e-shanasa ka ye israr hua hai

kuchh kaam kab aaya hai mera girya-e-shab bhi

israf-e-dil-o-jaan mera be-kar hua hai