jaanta hun ki kai log hain behtar mujhse

jāntā huuñ ki ka.ī log haiñ behtar mujh se

phir bhī ḳhvāhish hai ki dekho kabhī mil kar mujh se

sochtā kyā huuñ tire baare meñ chalte chalte

tū zarā pūchhnā ye baat Thahar kar mujh se

maiñ yahī soch ke har haal meñ ḳhush rahtā huuñ

ruuTh jaa.e na kahīñ merā muqaddar mujh se

mujh pe mat chhoḌ ki phir baa'd meñ pachhtā.egā

faisle Thiik hī ho jaate haiñ aksar mujh se

raat vo ḳhuun rulātī hai udāsī dil kī

rone lagtā hai lipaT kar mirā bistar mujh se

ahd-e-āġhāz-e-mohabbat tire anjām kī ḳhair

ab uThā.e nahīñ uThtā hai ye patthar mujh se

jaanta hun ki kai log hain behtar mujh se

phir bhi KHwahish hai ki dekho kabhi mil kar mujh se

sochta kya hun tere bare mein chalte chalte

tu zara puchhna ye baat Thahar kar mujh se

main yahi soch ke har haal mein KHush rahta hun

ruTh jae na kahin mera muqaddar mujh se

mujh pe mat chhoD ki phir ba'd mein pachhtaega

faisle Thik hi ho jate hain aksar mujh se

raat wo KHun rulati hai udasi dil ki

rone lagta hai lipaT kar mera bistar mujh se

ahd-e-aghaz-e-mohabbat tere anjam ki KHair

ab uThae nahin uThta hai ye patthar mujh se