jab hua irfan to gham aaram-e-jaan banta gaya

jab huā irfāñ to ġham ārām-e-jāñ bantā gayā

soz-e-jānāñ dil meñ soz-e-dīgarāñ bantā gayā

rafta rafta munqalib hotī ga.ī rasm-e-chaman

dhīre dhīre naġhma-e-dil bhī fuġhāñ bantā gayā

maiñ akelā hī chalā thā jānib-e-manzil magar

log saath aate ga.e aur kārvāñ bantā gayā

maiñ to jab jānūñ ki bhar de sāġhar-e-har-ḳhās-o-ām

yuuñ to jo aayā vahī pīr-e-muġhāñ bantā gayā

jis taraf bhī chal paḌe ham ābla-pāyān-e-shauq

ḳhaar se gul aur gul se gulsitāñ bantā gayā

sharh-e-ġham to muḳhtasar hotī ga.ī us ke huzūr

lafz jo muñh se na niklā dāstāñ bantā gayā

dahr meñ 'majrūh' koī jāvedāñ mazmūñ kahāñ

maiñ jise chhūtā gayā vo jāvedāñ bantā gayā

jab hua irfan to gham aaram-e-jaan banta gaya

soz-e-jaanan dil mein soz-e-digaran banta gaya

rafta rafta munqalib hoti gai rasm-e-chaman

dhire dhire naghma-e-dil bhi fughan banta gaya

main akela hi chala tha jaanib-e-manzil magar

log sath aate gae aur karwan banta gaya

main to jab jaanun ki bhar de saghar-e-har-KHas-o-am

yun to jo aaya wahi pir-e-mughan banta gaya

jis taraf bhi chal paDe hum aabla-payan-e-shauq

KHar se gul aur gul se gulsitan banta gaya

sharh-e-gham to muKHtasar hoti gai us ke huzur

lafz jo munh se na nikla dastan banta gaya

dahr mein 'majruh' koi jawedan mazmun kahan

main jise chhuta gaya wo jawedan banta gaya