jab na duniya mein raha mushkil-kusha mere liye

jab na duniyā meñ rahā mushkil-kushā mere liye

aa basā bandoñ meñ ḳhud merā ḳhudā mere liye

ishq kī manzil meñ mujh ko dekh kar sābit-qadam

husn kā pahlū banā mehmāñ-sarā mere liye

ab mirī ma.asūm nazroñ par tasadduq hai shabāb

baam par aane lage vo barmalā mere liye

ġham ke hāthoñ mar to jā.ūñ lekin is kā kyā ilaaj

zindagī kī intihā hai ibtidā mere liye

dair se rishta na ka.abe se ilāqa thā kabhī

ek tum hī ban ga.e ho devtā mere liye

ik mujassam kaif-o-mastī hai mire ghar ke qarīb

do qadam par khul gayā hai mai-kada mere liye

phir mirī dīvāngī ne aql ke nāḳhun liye

phir musībat ban ga.ī hirs-o-havā mere liye

maiñ ne har taḳhrīb meñ dekhī hai ik ta.amīr bhī

merā miT jaanā bhī hai himmat-fazā mere liye

jab na duniya mein raha mushkil-kusha mere liye

aa basa bandon mein KHud mera KHuda mere liye

ishq ki manzil mein mujh ko dekh kar sabit-qadam

husn ka pahlu bana mehman-sara mere liye

ab meri masum nazron par tasadduq hai shabab

baam par aane lage wo barmala mere liye

gham ke hathon mar to jaun lekin is ka kya ilaj

zindagi ki intiha hai ibtida mere liye

dair se rishta na kabe se ilaqa tha kabhi

ek tum hi ban gae ho dewta mere liye

ek mujassam kaif-o-masti hai mere ghar ke qarib

do qadam par khul gaya hai mai-kada mere liye

phir meri diwangi ne aql ke naKHun liye

phir musibat ban gai hirs-o-hawa mere liye

main ne har taKHrib mein dekhi hai ek tamir bhi

mera miT jaana bhi hai himmat-faza mere liye