jagmagati KHwahishon ka nur phaila raat bhar

jagmagātī ḳhvāhishoñ kā nuur phailā raat bhar

sehn-e-dil meñ vo gul-e-mahtāb bikhrā raat bhar

ek bhūlā vāqi.a jab daf.atan yaad aa gayā

ātish-e-zauq-e-talab ne phir jalāyā raat bhar

dostoñ ke saath din meñ baiTh kar hañstā rahā

apne kamre meñ vo jā kar ḳhuub royā raat bhar

niiñd ke sahrā meñ paanī kī tarah gum ho gayā

maiñ ne us ko ḳhvāb meñ har samt DhūñDā raat bhar

dhuup ke bādal baras kar jā chuke the aur maiñ

oḌh kar shabnam kī chādar chhat pe soyā raat bhar

niiñd kī komal fasīleñ āñdhiyoñ meñ bah ga.iiñ

maiñ ne apne ḳhvāb kī lāshoñ ko Dhoyā raat bhar

narm bistar par shikan kī kirchiyāñ bikhrī rahīñ

maiñ ne 'aslam' ik ajab sā ḳhvāb dekhā raat bhar

jagmagati KHwahishon ka nur phaila raat bhar

sehn-e-dil mein wo gul-e-mahtab bikhra raat bhar

ek bhula waqia jab dafatan yaad aa gaya

aatish-e-zauq-e-talab ne phir jalaya raat bhar

doston ke sath din mein baiTh kar hansta raha

apne kamre mein wo ja kar KHub roya raat bhar

nind ke sahra mein pani ki tarah gum ho gaya

main ne us ko KHwab mein har samt DhunDa raat bhar

dhup ke baadal baras kar ja chuke the aur main

oDh kar shabnam ki chadar chhat pe soya raat bhar

nind ki komal fasilen aandhiyon mein bah gain

main ne apne KHwab ki lashon ko Dhoya raat bhar

narm bistar par shikan ki kirchiyan bikhri rahin

main ne 'aslam' ek ajab sa KHwab dekha raat bhar