jahan dekho wahan maujud mera kirshn pyara hai

jahāñ dekho vahāñ maujūd merā kirshn pyārā hai

usī kā sab hai jalva jo jahāñ meñ āshkārā hai

bhalā maḳhlūq ḳhāliq kī sifat samjhe kahāñ qudrat

usī se neti neti ai yaar dīdoñ ne pukārā hai

na kuchh chārā chalā lāchār chāroñ haar kar baiThe

bichāre bed ne pyāre bahut tum ko bechāra hai

jo kuchh kahte haiñ ham ye bhī tirā jalva hai ik varna

kise tāqat jo muñh khole yahāñ har shaḳhs haarā hai

tirā dam bharte haiñ hindū agar nāqūs bajtā hai

tujhe bhī shaiḳh ne pyāre azaañ de kar pukārā hai

jo but patthar haiñ to ka.abe meñ kyā juz-ḳhāk-o-patthar haiñ

bahut bhūlā hai vo is farq meñ sar jis ne maarā hai

na hote jalva-gar tum to ye girjā kab kā gir jaatā

nasārā ko bhī to āḳhir tumhārā hī sahārā hai

tumhārā nuur hai har shai meñ kah so koī tak pyāre

usī se kah ke har har tum ko hindū ne pukārā hai

gunah baḳhsho rasā.ī do 'rasā' ko apne qadmoñ tak

burā hai yā bhalā hai jaisā hai pyāre tumhārā hai

jahan dekho wahan maujud mera kirshn pyara hai

usi ka sab hai jalwa jo jahan mein aashkara hai

bhala maKHluq KHaliq ki sifat samjhe kahan qudrat

usi se neti neti ai yar didon ne pukara hai

na kuchh chaara chala lachaar chaaron haar kar baiThe

bichaare bed ne pyare bahut tum ko bechaara hai

jo kuchh kahte hain hum ye bhi tera jalwa hai ek warna

kise taqat jo munh khole yahan har shaKHs haara hai

tera dam bharte hain hindu agar naqus bajta hai

tujhe bhi shaiKH ne pyare azan de kar pukara hai

jo but patthar hain to kabe mein kya juz-KHak-o-patthar hain

bahut bhula hai wo is farq mein sar jis ne mara hai

na hote jalwa-gar tum to ye girja kab ka gir jata

nasara ko bhi to aaKHir tumhaara hi sahaara hai

tumhaara nur hai har shai mein kah so koi tak pyare

usi se kah ke har har tum ko hindu ne pukara hai

gunah baKHsho rasai do 'rasa' ko apne qadmon tak

bura hai ya bhala hai jaisa hai pyare tumhaara hai