jahan-e-rang-o-bu kitna hasin hai

jahān-e-rañg-o-bū kitnā hasīñ hai

ye gulshan rashk-e-firdaus-e-barīñ hai

mirā husn-e-nazar husn-āfrīñ hai

ki har zarra jahāñ kā mah-jabīñ hai

tirī hastī se qaa.em hai ye hastī

ye hastī ḳhud koī hastī nahīñ hai

tirā dar chhoḌ kar jaa.eñ kahāñ ham

ki ye amn-o-amāñ kī sar-zamīñ hai

fasād-añgezī-e-āb-o-havā se

mizāj-ḳhāk yaañ ab ātishīñ hai

'hakīm' is se ḳhudā mahfūz rakkhe

ye sarkash nafas mār-e-āstīñ hai

jahan-e-rang-o-bu kitna hasin hai

ye gulshan rashk-e-firdaus-e-barin hai

mera husn-e-nazar husn-afrin hai

ki har zarra jahan ka mah-jabin hai

teri hasti se qaem hai ye hasti

ye hasti KHud koi hasti nahin hai

tera dar chhoD kar jaen kahan hum

ki ye amn-o-aman ki sar-zamin hai

fasad-angezi-e-ab-o-hawa se

mizaj-KHak yan ab aatishin hai

'hakim' is se KHuda mahfuz rakkhe

ye sarkash nafas mar-e-astin hai