janaza dhum se us aashiq-e-jaan-baz ka nikle

janāza dhuum se us āshiq-e-jāñ-bāz kā nikle

tamāshe ko ajab kyā vo but-e-dam-bāz aa nikle

agar dīvāna terā jānib-e-kohsār jā nikle

qubūr-e-vāmiq-o-majnūñ se shor-e-marhabā nikle

abhī tiflī hī meñ vo but namūna hai qayāmat kā

javānī meñ nahīñ mālūm kyā nām-e-ḳhudā nikle

kahāñ vo sard-mehrī thī kahāñ ye garm-joshī hai

ajab kyā is karam meñ bhī koī tarz-e-jafā nikle

mirā afsāna hai majzūb kī baḌ gar koī DhūñDe

na zāhir ho ḳhabar us kī na us kā mubtadā nikle

vo mere lāshe par bole nazar yuuñ pher kar mujh se

chale hūroñ se tum milne nihāyat bevafā nikle

hamārā dil hamārī aañkh donoñ un ke maskan haiñ

kabhī us ghar meñ jā dhamke kabhī is ghar meñ aa nikle

paḌā kis kashmakash meñ yaar ke ghar raat maiñ jā kar

na uTh kar mudda.ī jaa.e na merā mudda.ā nikle

taḌaptā huuñ bujhā de pyaas merī āb-e-ḳhanjar se

ki mere dil se ai qātil tire haq meñ duā nikle

dikhā kar zahr kī shīshī kahā 'ranjūr' se us ne

ajab kyā terī bīmārī kī ye hakmī davā nikle

janaza dhum se us aashiq-e-jaan-baz ka nikle

tamashe ko ajab kya wo but-e-dam-baz aa nikle

agar diwana tera jaanib-e-kohsar ja nikle

qubur-e-wamiq-o-majnun se shor-e-marhaba nikle

abhi tifli hi mein wo but namuna hai qayamat ka

jawani mein nahin malum kya nam-e-KHuda nikle

kahan wo sard-mehri thi kahan ye garm-joshi hai

ajab kya is karam mein bhi koi tarz-e-jafa nikle

mera afsana hai majzub ki baD gar koi DhunDe

na zahir ho KHabar us ki na us ka mubtada nikle

wo mere lashe par bole nazar yun pher kar mujh se

chale huron se tum milne nihayat bewafa nikle

hamara dil hamari aankh donon un ke maskan hain

kabhi us ghar mein ja dhamke kabhi is ghar mein aa nikle

paDa kis kashmakash mein yar ke ghar raat main ja kar

na uTh kar muddai jae na mera muddaa nikle

taDapta hun bujha de pyas meri aab-e-KHanjar se

ki mere dil se ai qatil tere haq mein dua nikle

dikha kar zahr ki shishi kaha 'ranjur' se us ne

ajab kya teri bimari ki ye hakmi dawa nikle