jazba-e-shauq ko is taur ubhaara jae

jazba-e-shauq ko is taur ubhārā jaa.e

ham jidhar jaa.eñ udhar un kā nazārā jaa.e

aapsī rishtoñ kī ḳhushbū ko koī naam na do

is taqaddus ko na kāġhaz par utārā jaa.e

saikḌoñ naam tire aur haiñ be-nām bhī tū

kaun se naam se ab tujh ko pukārā jaa.e

raqs kartī hai lahaktī hai ajab mastī meñ

kashtī-e-dil ke bhañvar meñ jo utārā jaa.e

merī ġhairat ko kisī taur gavārā hī nahīñ

tañg-dastī meñ bhī haath apnā pasārā jaa.e

dil ke so.e hue armānoñ ne añgḌā.ī lī

zindagī aa tujhe shīshe meñ utārā jaa.e

sub.h-e-raushan ko to aanā hai vo aa.egī zarūr

is bharose pe shab-e-ġham ko guzārā jaa.e

aa.ina dekh ke nāhaq ye bigaḌnā kaisā

gard ā.īne pe hai us ko utārā jaa.e

apne purkhoñ kī ināyāt kī tāzīm karo

ye hai vo qarz jo sadiyoñ na utārā jaa.e

aaj ke daur meñ vājib hai yahī 'chāñd' ki ham

saath deñ us kā jidhar vaqt kā dhārā jaa.e

jazba-e-shauq ko is taur ubhaara jae

hum jidhar jaen udhar un ka nazara jae

aapsi rishton ki KHushbu ko koi nam na do

is taqaddus ko na kaghaz par utara jae

saikDon nam tere aur hain be-nam bhi tu

kaun se nam se ab tujh ko pukara jae

raqs karti hai lahakti hai ajab masti mein

kashti-e-dil ke bhanwar mein jo utara jae

meri ghairat ko kisi taur gawara hi nahin

tang-dasti mein bhi hath apna pasara jae

dil ke soe hue armanon ne angDai li

zindagi aa tujhe shishe mein utara jae

subh-e-raushan ko to aana hai wo aaegi zarur

is bharose pe shab-e-gham ko guzara jae

aaina dekh ke nahaq ye bigaDna kaisa

gard aaine pe hai us ko utara jae

apne purkhon ki inayat ki tazim karo

ye hai wo qarz jo sadiyon na utara jae

aaj ke daur mein wajib hai yahi 'chand' ki hum

sath den us ka jidhar waqt ka dhaara jae