jhaTak ke chal nahin sakta hun tere dhyan ko main

jhaTak ke chal nahīñ saktā huuñ tere dhyān ko maiñ

uThā.e phirtā huuñ sar par ik āsmān ko maiñ

maiñ tujh se apnā ta.alluq chhupā nahīñ saktā

jabīñ se kaise miTā duuñ tire nishān ko maiñ

ye log mujh se udāsī kī vaj.h pūchhte haiñ

batā chukā huuñ tirā naam ik jahān ko maiñ

jo ahd kar ke har ik ahd toḌ Dāltā hai

zabān dūñgā bhalā aise be-zabān ko maiñ

maiñ fat.h kar ke koī qil.a kyā karūñgā 'salīm'

lo aaj toḌtā huuñ tiir ko kamān ko maiñ

jhaTak ke chal nahin sakta hun tere dhyan ko main

uThae phirta hun sar par ek aasman ko main

main tujh se apna talluq chhupa nahin sakta

jabin se kaise miTa dun tere nishan ko main

ye log mujh se udasi ki wajh puchhte hain

bata chuka hun tera nam ek jahan ko main

jo ahd kar ke har ek ahd toD Dalta hai

zaban dunga bhala aise be-zaban ko main

main fath kar ke koi qila kya karunga 'salim'

lo aaj toDta hun tir ko kaman ko main