jhil mein bahte phul kanwal ke jhuTe the

jhiil meñ bahte phuul kañval ke jhūTe the

ḳhvāb jo ham ne mil kar dekhe jhūTe the

maiñ hī TuuT ke bikhrā aur na royā vo

ab ke hijr ke mausam kitne jhūTe the

jin kī ḳhātir tum ne mujh ko chhoḌ diyā

farz karo ki vo andeshe jhūTe the

vīrāñ ghar kī tārīkī meñ tanhā ḳhvāb

itne sachche kab the jitne jhūTe the

dil ko aaj tasallī maiñ ne de Daalī

vo sachchā thā us ke vaade jhūTe the

bahte dariyā kī vo lahreñ sachchī thiiñ

naav māñjhī aur kināre jhūTe the

jañgal jañgal ghuum ke maiñ ne dekh liyā

guzre vaqtoñ ke shahzāde jhūTe the

jhil mein bahte phul kanwal ke jhuTe the

KHwab jo hum ne mil kar dekhe jhuTe the

main hi TuT ke bikhra aur na roya wo

ab ke hijr ke mausam kitne jhuTe the

jin ki KHatir tum ne mujh ko chhoD diya

farz karo ki wo andeshe jhuTe the

viran ghar ki tariki mein tanha KHwab

itne sachche kab the jitne jhuTe the

dil ko aaj tasalli main ne de Dali

wo sachcha tha us ke wade jhuTe the

bahte dariya ki wo lahren sachchi thin

naw manjhi aur kinare jhuTe the

jangal jangal ghum ke main ne dekh liya

guzre waqton ke shahzade jhuTe the