jin ke liye apne to yun jaan nikalte hain

jin ke liye apne to yuuñ jaan nikalte haiñ

is raah meñ ve jaise anjān nikalte haiñ

kyā tīr-e-sitam us ke siine meñ bhī TuuTe the

jis zaḳhm ko chīrūñ huuñ paikān nikalte haiñ

mat sahl hameñ jaano phirtā hai falak barsoñ

tab ḳhaak ke parde se insān nikalte haiñ

kis kā hai qimāsh aisā gūdaḌ bhare haiñ saare

dekho na jo logoñ ke dīvān nikalte haiñ

gah lohū Tapaktā hai gah laḳht-e-dil āñkhoñ se

yā TukḌe jigar hī ke har aan nikalte haiñ

kariye to gila kis se jaisī thī hameñ ḳhvāhish

ab vaise hī ye apne armān nikalte haiñ

jāgah se bhī jaate ho muñh se bhī ḳhashin ho kar

ve harf nahīñ haiñ jo shāyān nikalte haiñ

so kaahe ko apnī tū jogī kī sī pherī hai

barsoñ meñ kabhū īdhar ham aan nikalte haiñ

un ā.īna-rūyoñ ke kyā 'mīr' bhī āshiq haiñ

jab ghar se nikalte haiñ hairān nikalte haiñ

jin ke liye apne to yun jaan nikalte hain

is rah mein we jaise anjaan nikalte hain

kya tir-e-sitam us ke sine mein bhi TuTe the

jis zaKHm ko chirun hun paikan nikalte hain

mat sahl hamein jaano phirta hai falak barson

tab KHak ke parde se insan nikalte hain

kis ka hai qimash aisa gudaD bhare hain sare

dekho na jo logon ke diwan nikalte hain

gah lohu Tapakta hai gah laKHt-e-dil aankhon se

ya TukDe jigar hi ke har aan nikalte hain

kariye to gila kis se jaisi thi hamein KHwahish

ab waise hi ye apne arman nikalte hain

jagah se bhi jate ho munh se bhi KHashin ho kar

we harf nahin hain jo shayan nikalte hain

so kahe ko apni tu jogi ki si pheri hai

barson mein kabhu idhar hum aan nikalte hain

un aaina-ruyon ke kya 'mir' bhi aashiq hain

jab ghar se nikalte hain hairan nikalte hain