jis ki aankhon mein koi rang-e-shanasai na tha

jis kī āñkhoñ meñ koī rañg-e-shanāsā.ī na thā

us se milne kā mirā dil bhī tamannā.ī na thā

ham dayār-e-ġhair meñ kahte rahe haiñ dil kī baat

ek apne shahr hī meñ izn-e-goyā.ī na thā

jazba-e-dil ke bahak jaane se rusvā ho ga.e

kūcha-e-mahbūb varna kū-rusvā.ī na thā

zulmat-e-shab ko jahāñ nūr-e-sahar kahte the log

merā sach kahnā sazāvār-e-pazīrā.ī na thā

daad bhī detā na thā vo mere jazb-e-shauq kī

ḳhāmushī āñkhoñ meñ lab par harf-e-goyā.ī na thā

terī be-mehrī na thī kotāhī-e-qismat bhī thī

kār-zār-e-dil meñ varna shauq-e-paspā.ī na thā

merī apnī zaat hī ik anjuman se kam na thī

is liye 'sajjād' mujh ko ḳhauf-e-tanhā.ī na thā

jis ki aankhon mein koi rang-e-shanasai na tha

us se milne ka mera dil bhi tamannai na tha

hum dayar-e-ghair mein kahte rahe hain dil ki baat

ek apne shahr hi mein izn-e-goyai na tha

jazba-e-dil ke bahak jaane se ruswa ho gae

kucha-e-mahbub warna ku-ruswai na tha

zulmat-e-shab ko jahan nur-e-sahar kahte the log

mera sach kahna sazawar-e-pazirai na tha

dad bhi deta na tha wo mere jazb-e-shauq ki

KHamushi aankhon mein lab par harf-e-goyai na tha

teri be-mehri na thi kotahi-e-qismat bhi thi

kar-zar-e-dil mein warna shauq-e-paspai na tha

meri apni zat hi ek anjuman se kam na thi

is liye 'sajjad' mujh ko KHauf-e-tanhai na tha