jo dil ko pahle mayassar tha kya hua us ka

jo dil ko pahle mayassar thā kyā huā us kā

jo is sukūn se behtar thā kyā huā us kā

kahāñ liye chalī jaatī hai mujh ko vīrānī

yahīñ kahīñ pe mirā ghar thā kyā huā us kā

kuchh aise ashk piye haiñ ki ab ḳhabar hī nahīñ

is aañkh meñ jo samundar thā kyā huā us kā

nazar ga.ī so ga.ī par koī batā.e mujhe

baḌe kamāl kā manzar thā kyā huā us kā

ye sochne nahīñ detā sitamgaroñ kā hujūm

ki vo jo pahlā sitam-gar thā kyā huā us kā

maiñ sub.h ḳhvāb se jaagā to ye ḳhayāl aayā

jo raat mere barābar thā kyā huā us kā

maiñ jis ke haath lagā huuñ use mubārak ho

magar jo merā muqaddar thā kyā huā us kā

jo dil ko pahle mayassar tha kya hua us ka

jo is sukun se behtar tha kya hua us ka

kahan liye chali jati hai mujh ko virani

yahin kahin pe mera ghar tha kya hua us ka

kuchh aise ashk piye hain ki ab KHabar hi nahin

is aankh mein jo samundar tha kya hua us ka

nazar gai so gai par koi batae mujhe

baDe kamal ka manzar tha kya hua us ka

ye sochne nahin deta sitamgaron ka hujum

ki wo jo pahla sitam-gar tha kya hua us ka

main subh KHwab se jaga to ye KHayal aaya

jo raat mere barabar tha kya hua us ka

main jis ke hath laga hun use mubarak ho

magar jo mera muqaddar tha kya hua us ka