jo ishq mein guzara lamha pasand aaya

jo ishq meñ guzāra lamha pasand aayā

āñkhoñ meñ bas gayā jo chehra pasand aayā

yuuñ to safar kiyā hai kitne hī rāstoñ par

lekin tire hī ghar kā rasta pasand aayā

merī nigāh meñ hai terī talāsh baaqī

merī dīvāngī ko sahrā pasand aayā

be-shak nibhā na paa.e va.ada kiyā jo tum ne

lekin sanam tumhārā va.ada pasand aayā

uThtī hai is liye bhī terī taraf nigāheñ

tere hasīn ruḳh par chashma pasand aayā

ġhusse meñ lag rahī ho tum aur ḳhūb-sūrat

dil ko bahut tumhārā naḳhra pasand aayā

kuchh aur dekhne kī hasrat rahī na baaqī

jab se sanam tumhārā chehra pasand aayā

ho jā.egī mukammal ab to ġhazal yaqīñ hai

tere hasīñ laboñ kā misra pasand aayā

be-shak bahut shikāyat tujh ko hai is jahāñ se

phir bhī 'ahad' ye terā lahja pasand aayā

jo ishq mein guzara lamha pasand aaya

aankhon mein bas gaya jo chehra pasand aaya

yun to safar kiya hai kitne hi raston par

lekin tere hi ghar ka rasta pasand aaya

meri nigah mein hai teri talash baqi

meri diwangi ko sahra pasand aaya

be-shak nibha na pae wada kiya jo tum ne

lekin sanam tumhaara wada pasand aaya

uThti hai is liye bhi teri taraf nigahen

tere hasin ruKH par chashma pasand aaya

ghusse mein lag rahi ho tum aur KHub-surat

dil ko bahut tumhaara naKHra pasand aaya

kuchh aur dekhne ki hasrat rahi na baqi

jab se sanam tumhaara chehra pasand aaya

ho jaegi mukammal ab to ghazal yaqin hai

tere hasin labon ka misra pasand aaya

be-shak bahut shikayat tujh ko hai is jahan se

phir bhi 'ahad' ye tera lahja pasand aaya