jo nahin lagti thi kal tak ab wahi achchhi lagi

jo nahīñ lagtī thī kal tak ab vahī achchhī lagī

dekh kar us ko jo dekhā zindagī achchhī lagī

thak ke sūraj shaam kī bāñhoñ meñ jā kar so gayā

raat bhar yādoñ kī bastī jāgtī achchhī lagī

muntazir thā vo na ham hoñ to hamārā naam le

us kī mahfil meñ hameñ apnī kamī achchhī lagī

vaqt-e-ruḳhsat bhīgtī palkoñ kā manzar yaad hai

phuul sī āñkhoñ meñ shabnam kī namī achchhī lagī

dā.ere meñ apne ham donoñ safar karte rahe

barf sī donoñ jazīroñ par jamī achchhī lagī

ik qadam ke fāsle par donoñ aa kar ruk ga.e

bas yahī manzil safar kī āḳhirī achchhī lagī

jo nahin lagti thi kal tak ab wahi achchhi lagi

dekh kar us ko jo dekha zindagi achchhi lagi

thak ke suraj sham ki banhon mein ja kar so gaya

raat bhar yaadon ki basti jagti achchhi lagi

muntazir tha wo na hum hon to hamara nam le

us ki mahfil mein hamein apni kami achchhi lagi

waqt-e-ruKHsat bhigti palkon ka manzar yaad hai

phul si aankhon mein shabnam ki nami achchhi lagi

daere mein apne hum donon safar karte rahe

barf si donon jaziron par jami achchhi lagi

ek qadam ke fasle par donon aa kar ruk gae

bas yahi manzil safar ki aaKHiri achchhi lagi