juda wo hote to hum unki justuju karte

judā vo hote to ham un kī justujū karte

alag nahīñ haiñ to phir kis kī aarzū karte

milā na ham ko kabhī arz-e-hāl kā mauqa.a

zabāñ na chaltī to āñkhoñ se guftugū karte

agar ye jānte ham bhī unhīñ kī sūrat haiñ

kamāl-e-shauq se apnī hī justujū karte

jo ḳhaak chāk-e-jigar hai to purze purze dil

junūñ ke hosh meñ kis kis ko ham rafū karte

dil-e-hazīñ ke makīñ tū agar sadā detā

tirī talāsh kabhī ham na kū-ba-kū karte

kamāl-e-josh-e-talab kā yahī taqāza hai

hameñ vo DhūñDte ham un kī justujū karte

namāz-e-ishq tumhārī qubūl ho jaatī

agar sharāb se tum ai 'ratan' vazū karte

juda wo hote to hum un ki justuju karte

alag nahin hain to phir kis ki aarzu karte

mila na hum ko kabhi arz-e-haal ka mauqa

zaban na chalti to aankhon se guftugu karte

agar ye jaante hum bhi unhin ki surat hain

kamal-e-shauq se apni hi justuju karte

jo KHak chaak-e-jigar hai to purze purze dil

junun ke hosh mein kis kis ko hum rafu karte

dil-e-hazin ke makin tu agar sada deta

teri talash kabhi hum na ku-ba-ku karte

kamal-e-josh-e-talab ka yahi taqaza hai

hamein wo DhunDte hum un ki justuju karte

namaz-e-ishq tumhaari qubul ho jati

agar sharab se tum ai 'ratan' wazu karte