kanch ki zanjir TuTi to sada bhi aaegi

kāñch kī zanjīr TuuTī to sadā bhī aa.egī

aur bhare bāzār meñ tujh ko hayā bhī aa.egī

itr meñ kapḌe basā kar mutma.in hai kis liye

bā-vafā hū jā ki yuuñ bū-e-vafā bhī aa.egī

dekh le sāhil se jī bhar ke machaltī lahr ko

is taraf kuchh der meñ mauj-e-fanā bhī aa.egī

dūdhiyā nāzuk gale meñ bāñdh le ta.avīz ko

aaj suntā huuñ ki bastī meñ balā bhī aa.egī

raat ke pichhle pahar dastak kā rakh lenā ḳhayāl

patte khaḌkeñge zarā āvāz-e-pā bhī aa.egī

ujlī ujlī ḳhvāhishoñ par niiñd kī chādar na Daal

yaad ke rauzan se kuchh taaza havā bhī aa.egī

jā chuke saare bagūle fikr kī kyā baat hai

khet ko sairāb karne ab ghaTā bhī aa.egī

daur ke logoñ ko nazroñ meñ basā kar dekh le

qurb mil jā.egā āñkhoñ meñ jilā bhī aa.egī

shahr-e-nā-pursāñ ke manzar naqsh kar le zehn meñ

aañkh raste meñ koī manzar girā bhī aa.egī

dil kī masjid meñ kabhī paḌh le tahajjud kī namāz

phir sahar ke vaqt hoñToñ par duā bhī aa.egī

zindagī kā ye maraz 'afzal' chalā hī jā.egā

tere hāthoñ meñ kabhī ḳhāk-e-shifā bhī aa.egī

kanch ki zanjir TuTi to sada bhi aaegi

aur bhare bazar mein tujh ko haya bhi aaegi

itr mein kapDe basa kar mutmain hai kis liye

ba-wafa hu ja ki yun bu-e-wafa bhi aaegi

dekh le sahil se ji bhar ke machalti lahr ko

is taraf kuchh der mein mauj-e-fana bhi aaegi

dudhiya nazuk gale mein bandh le tawiz ko

aaj sunta hun ki basti mein bala bhi aaegi

raat ke pichhle pahar dastak ka rakh lena KHayal

patte khaDkenge zara aawaz-e-pa bhi aaegi

ujli ujli KHwahishon par nind ki chadar na Dal

yaad ke rauzan se kuchh taza hawa bhi aaegi

ja chuke sare bagule fikr ki kya baat hai

khet ko sairab karne ab ghaTa bhi aaegi

daur ke logon ko nazron mein basa kar dekh le

qurb mil jaega aankhon mein jila bhi aaegi

shahr-e-na-pursan ke manzar naqsh kar le zehn mein

aankh raste mein koi manzar gira bhi aaegi

dil ki masjid mein kabhi paDh le tahajjud ki namaz

phir sahar ke waqt honTon par dua bhi aaegi

zindagi ka ye maraz 'afzal' chala hi jaega

tere hathon mein kabhi KHak-e-shifa bhi aaegi