kab is se qabl nazar mein gul-e-malal khila

kab is se qabl nazar meñ gul-e-malāl khilā

kisī kī yaad meñ lekin ye ab ke saal khilā

ajiib āb-o-havā thī ajiib thī miTTī

so dil ke goshe meñ ik phuul be-misāl khilā

maiñ chhū ke dekh rahī thī ki sabza-e-ruḳh par

gulāb-e-surḳh kī sūrat tirā jamāl khilā

maiñ dam-ba-ḳhud hī rahī aur shīsha-e-jāñ par

misāl-e-reza-e-ḳhurshīd ik visāl khilā

safar kī shaam sitāra nasīb kā jaagā

phir āsmān-e-mohabbat pe ik hilāl khilā

isī tarah se tirī yaad gul khilātī rahī

ki zaḳhm bharne lagā jab to indimāl khilā

ye vāqi.a hai ki is baar to bahār ke ba.ad

khilā hai gulshan-e-ummīd aur kamāl khilā

kab is se qabl nazar mein gul-e-malal khila

kisi ki yaad mein lekin ye ab ke sal khila

ajib aab-o-hawa thi ajib thi miTTi

so dil ke goshe mein ek phul be-misal khila

main chhu ke dekh rahi thi ki sabza-e-ruKH par

gulab-e-surKH ki surat tera jamal khila

main dam-ba-KHud hi rahi aur shisha-e-jaan par

misal-e-reza-e-KHurshid ek visal khila

safar ki sham sitara nasib ka jaga

phir aasman-e-mohabbat pe ek hilal khila

isi tarah se teri yaad gul khilati rahi

ki zaKHm bharne laga jab to indimal khila

ye waqia hai ki is bar to bahaar ke baad

khila hai gulshan-e-ummid aur kamal khila