kabhi kabhi chup ho jaane ki KHwahish hoti hai

kabhī kabhī chup ho jaane kī ḳhvāhish hotī hai

aaise meñ jab tīr-e-sitam kī bārish hotī hai

haal hamārā sunñe vaale jaane kyā socheñ

yuuñ bhī kaisī kaisī zehnī kāvish hotī hai

dīvāroñ par kyā likkhā hai paḌh ke batlāo

kyā aisī bātoñ par yaaro nālish hotī hai

ham is kī ta.amīl meñ dīvāne ban jaate haiñ

dil aaise nādāñ kī jab farmā.ish hotī hai

duniyā se ik roz hamārī baat huī chhup kar

so be-chārī kī ab tak fahmā.ish hotī hai

ek hī chhat ke nīche chāroñ vahshī kyā baiThe

dānāoñ ne samjhā koī sāzish hotī hai

yuuñ bhī ham ko shā.er-vā.er kahlānā kab thā

sheroñ meñ bhī apne jhūTī dānish hotī hai

kabhi kabhi chup ho jaane ki KHwahish hoti hai

aaise mein jab tir-e-sitam ki barish hoti hai

haal hamara sunne wale jaane kya sochen

yun bhi kaisi kaisi zehni kawish hoti hai

diwaron par kya likkha hai paDh ke batlao

kya aisi baaton par yaro nalish hoti hai

hum is ki tamil mein diwane ban jate hain

dil aaise nadan ki jab farmaish hoti hai

duniya se ek roz hamari baat hui chhup kar

so be-chaari ki ab tak fahmaish hoti hai

ek hi chhat ke niche chaaron wahshi kya baiThe

danaon ne samjha koi sazish hoti hai

yun bhi hum ko shaer-waer kahlana kab tha

sheron mein bhi apne jhuTi danish hoti hai