kabhi sar pe chaDhe kabhi sar se guzre kabhi panw aan gire dariya

kabhī sar pe chaḌhe kabhī sar se guzre kabhī paañv aan gire dariyā

kabhī mujhe bahā kar le jaa.e kabhī mujh meñ aan bahe dariyā

gaatā huuñ mere sur meñ sur mil jaa.e us kī lahroñ kā

merī aañkh meñ aañsū dekhe to phir apnī aañkh bhare dariyā

maiñ apnī use sunātā huuñ vo apnī mujhe sunātā hai

maiñ chup to vo bhī chup hai aur maiñ kahūñ to baat kahe dariyā

kahīñ barf lapeTe baiThā hai kahīñ ret bichhā kar leTā hai

kabhī jañgal meñ Derā Daale kabhī bastī aan base dariyā

ai dariyā! terā paaT baḌā, ai dariyā! terā zor baḌā

ai dariyā! gum ho kar tujh meñ qatre kā naam paḌe dariyā

ai shā.er! terā dard baḌā ai shā.er! terī soch baḌī

ai shā.er! tere siine meñ is jaisā laakh bahe dariyā

kabhi sar pe chaDhe kabhi sar se guzre kabhi panw aan gire dariya

kabhi mujhe baha kar le jae kabhi mujh mein aan bahe dariya

gata hun mere sur mein sur mil jae us ki lahron ka

meri aankh mein aansu dekhe to phir apni aankh bhare dariya

main apni use sunata hun wo apni mujhe sunata hai

main chup to wo bhi chup hai aur main kahun to baat kahe dariya

kahin barf lapeTe baiTha hai kahin ret bichha kar leTa hai

kabhi jangal mein Dera Dale kabhi basti aan base dariya

ai dariya! tera paT baDa, ai dariya! tera zor baDa

ai dariya! gum ho kar tujh mein qatre ka nam paDe dariya

ai shaer! tera dard baDa ai shaer! teri soch baDi

ai shaer! tere sine mein is jaisa lakh bahe dariya