kah rahi hai sari duniya tera diwana mujhe

kah rahī hai saarī duniyā terā dīvāna mujhe

terī nazroñ ne banā Daalā hai afsāna mujhe

ishq meñ ab mil ga.ī hai mujh ko merāj-e-junūñ

ab to vo bhī kah rahe haiñ apnā dīvāna mujhe

dars-e-ibrat hai tumhāre vāste merā ma.aal

ġhuncha o gul ko sunānā hai ye afsāna mujhe

ik nigāh-e-nāz ne saaqī kī ye kyā kar diyā

rafta rafta kah uThe sab pīr-e-mai-ḳhāna mujhe

tū sarāpā nuur hai maiñ terā aks-e-ḳhās huuñ

kah rahe haiñ yuuñ tirā sab ā.īna-ḳhāna mujhe

sun rahī thī shauq se duniyā jise ai ham-nafas

yaad hai haañ yaad hai vo merā afsāna mujhe

nuur se bhar puur ho jaatī hai bazm-e-ārzū

jab kabhī vo dekhte haiñ be-hijābāna mujhe

al-madad ai zohd baḌh kar rok le mere qadam

tishnagī phir le chalī hai sū-e-mai-ḳhāna mujhe

ham-nafas merī to fitrat hī sanā-e-husn hai

ishq ke bande kahā karte haiñ dīvāna mujhe

mujh ko 'qaisar' mai-kade se nikle ik muddat huī

yaad karte haiñ abhī tak jaam o paimāna mujhe

kah rahi hai sari duniya tera diwana mujhe

teri nazron ne bana Dala hai afsana mujhe

ishq mein ab mil gai hai mujh ko meraj-e-junun

ab to wo bhi kah rahe hain apna diwana mujhe

dars-e-ibrat hai tumhaare waste mera maal

ghuncha o gul ko sunana hai ye afsana mujhe

ek nigah-e-naz ne saqi ki ye kya kar diya

rafta rafta kah uThe sab pir-e-mai-KHana mujhe

tu sarapa nur hai main tera aks-e-KHas hun

kah rahe hain yun tera sab aaina-KHana mujhe

sun rahi thi shauq se duniya jise ai ham-nafas

yaad hai han yaad hai wo mera afsana mujhe

nur se bhar pur ho jati hai bazm-e-arzu

jab kabhi wo dekhte hain be-hijabana mujhe

al-madad ai zohd baDh kar rok le mere qadam

tishnagi phir le chali hai su-e-mai-KHana mujhe

ham-nafas meri to fitrat hi sana-e-husn hai

ishq ke bande kaha karte hain diwana mujhe

mujh ko 'qaisar' mai-kade se nikle ek muddat hui

yaad karte hain abhi tak jam o paimana mujhe