kahin se bas nae mausamon ki lati hui

kahīñ se baas na.e mausamoñ kī laatī huī

havā-e-tāza dar-e-nīm-vā se aatī huī

ba-taur-e-ḳhās kahāñ is nagar sabā kā varūd

kabhī kabhī yūñhī ruktī hai aatī jaatī huī

maiñ apne dhyān meñ gum-sum aur ek sā.at-e-shoḳh

guzar ga.ī mirī hālat pe muskurātī huī

sarāb-e-ḳhvāhish-e-āsūdgī magar koī shai

milī nahīñ hai tabī.at se mel khātī huī

lahū meñ tairtī ḳhāmoshiyoñ ke saath kahīñ

ravāñ-davāñ hai koī chīḳh sansanātī huī

yahāñ vahāñ haiñ ka.ī ḳhvāb jagmagāte hue

kahīñ kahīñ koī ta.abīr TimTimātī huī

kahin se bas nae mausamon ki lati hui

hawa-e-taza dar-e-nim-wa se aati hui

ba-taur-e-KHas kahan is nagar saba ka warud

kabhi kabhi yunhi rukti hai aati jati hui

main apne dhyan mein gum-sum aur ek saat-e-shoKH

guzar gai meri haalat pe muskuraati hui

sarab-e-KHwahish-e-asudgi magar koi shai

mili nahin hai tabiat se mel khati hui

lahu mein tairti KHamoshiyon ke sath kahin

rawan-dawan hai koi chiKH sansanati hui

yahan wahan hain kai KHwab jagmagate hue

kahin kahin koi tabir TimTimati hui