kase kajawe mahmalon ke aur jaga raat ka tara bhi

kase kajāve mahmaloñ ke aur jaagā raat kā taarā bhī

chhoḌ dī bastī nāqoñ ne ḳhāmosh huā naqqārā bhī

chāñd sī āñkheñ khel rahī thiiñ surḳh pahāḌ kī oToñ se

pūrab or se taak rahā thā uTh kar abr kā paara bhī

qāfile gard-e-safar meñ Dūbe, ghanTiyoñ kī āvāz ghuTī

āḳhirī uuñT kī pusht pe Daalā raat ne siyāh ġharāra bhī

shahr ke chauk meñ vīrānī hai aag bujhī, andher huā

raakh saroñ meñ Daal ke baiThe, aaj tire āvāra bhī

koī na rasta naap sakā hai, ret pe chalne vāloñ kā

agle qadam par miT jā.egā pahlā naqsh hamārā bhī

kase kajawe mahmalon ke aur jaga raat ka tara bhi

chhoD di basti naqon ne KHamosh hua naqqara bhi

chand si aankhen khel rahi thin surKH pahaD ki oTon se

purab or se tak raha tha uTh kar abr ka para bhi

qafile gard-e-safar mein Dube, ghanTiyon ki aawaz ghuTi

aaKHiri unT ki pusht pe Dala raat ne siyah gharara bhi

shahr ke chauk mein virani hai aag bujhi, andher hua

rakh saron mein Dal ke baiThe, aaj tere aawara bhi

koi na rasta nap saka hai, ret pe chalne walon ka

agle qadam par miT jaega pahla naqsh hamara bhi