kaun tanhai ka ehsas dilata hai mujhe

kaun tanhā.ī kā ehsās dilātā hai mujhe

ye bharā shahr bhī tanhā nazar aatā hai mujhe

jaane kis moḌ pe kho jaa.e añdhere meñ kahīñ

vo to ḳhud saaya hai jo raah dikhātā hai mujhe

us kī palkoñ se Dhalak jā.ūñ na aañsū ban kar

ḳhvāb kī tarah jo āñkhoñ meñ sajātā hai mujhe

'aks tā 'aks badal saktī huuñ chehra maiñ bhī

merā maazī magar ā.īna dikhātā hai mujhe

vo bhī pahchān na paayā mujhe apnoñ kī tarah

phuul bhī kahtā hai patthar bhī batātā hai mujhe

ajnabī lagne lagā hai mujhe ghar kā āñgan

kyā koī shahr-e-nigārāñ se bulātā hai mujhe

kisī rut meñ bhī mirī aas na TuuTī 'sarvat'

har nayā jhoñkā ḳhalāoñ meñ uḌātā hai mujhe

kaun tanhai ka ehsas dilata hai mujhe

ye bhara shahr bhi tanha nazar aata hai mujhe

jaane kis moD pe kho jae andhere mein kahin

wo to KHud saya hai jo rah dikhata hai mujhe

us ki palkon se Dhalak jaun na aansu ban kar

KHwab ki tarah jo aankhon mein sajata hai mujhe

'aks ta 'aks badal sakti hun chehra main bhi

mera mazi magar aaina dikhata hai mujhe

wo bhi pahchan na paya mujhe apnon ki tarah

phul bhi kahta hai patthar bhi batata hai mujhe

ajnabi lagne laga hai mujhe ghar ka aangan

kya koi shahr-e-nigaran se bulata hai mujhe

kisi rut mein bhi meri aas na TuTi 'sarwat'

har naya jhonka KHalaon mein uData hai mujhe