kaun yan bazar-e-KHubi mein tera ham-sang hai

kaun yaañ bāzār-e-ḳhūbī meñ tirā ham-sañg hai

husn ke mīzāñ meñ tere mahr-o-mah pasañg hai

maiñ vo huuñ dīvāna-e-sarḳhīl-e-arbāb-e-junūñ

haath meñ patthar liye har tifl mere sañg hai

jā-e-takiya āshiq-e-be-ḳhānumāñ ko vaqt-e-ḳhvāb

zer-e-sar kūche meñ tere ḳhisht hai pasañg hai

is javāhar-posh ke dekhe haiñ vo yāqūt-e-lab

jis kī rañgīnī ke aage la.al bhī ik sañg hai

surma.ī āñkhoñ kā tere jo koī bīmār ho

ek miil us ke ta.iiñ rakhnā qadam farsañg hai

jal gayā tanhā na koh-e-tūr hī parvāna-vār

aag tere ishq kī sham-e-dil-e-har-sañg hai

saḳht-jānī merī aur zālim tire sañgīñ-dilī

aah misl-e-āsiyā ye sañg uupar sañg hai

baap kā hai faḳhr vo beTā ki rakhtā ho kamāl

dekh ā.īne ko farzand-e-rashīd-e-sañg hai

sar mirā tere qadam ke saath yuuñ hai pesh-rau

Thokaroñ meñ jis tarah se rah-guzar kā sañg hai

e'tiqād-e-momin-o-kāfir hai rahbar varna phir

kuchh nahīñ dair-o-haram meñ ḳhaak hai pasañg hai

ye sadā ghar ghar kare hai āsiyā phir phir mudām

musht-e-gandum ke liye chhānī ke upar sañg hai

shaiḳh kī masjid se ai 'bedār' kyā hai tujh ko kaam

sajda-gah apnā sanam ke āstāñ kā sañg hai

kaun yan bazar-e-KHubi mein tera ham-sang hai

husn ke mizan mein tere mahr-o-mah pasang hai

main wo hun diwana-e-sarKHil-e-arbab-e-junun

hath mein patthar liye har tifl mere sang hai

ja-e-takiya aashiq-e-be-KHanuman ko waqt-e-KHwab

zer-e-sar kuche mein tere KHisht hai pasang hai

is jawahar-posh ke dekhe hain wo yaqut-e-lab

jis ki rangini ke aage lal bhi ek sang hai

surmai aankhon ka tere jo koi bimar ho

ek mil us ke tain rakhna qadam farsang hai

jal gaya tanha na koh-e-tur hi parwana-war

aag tere ishq ki sham-e-dil-e-har-sang hai

saKHt-jaani meri aur zalim tere sangin-dili

aah misl-e-asiya ye sang upar sang hai

bap ka hai faKHr wo beTa ki rakhta ho kamal

dekh aaine ko farzand-e-rashid-e-sang hai

sar mera tere qadam ke sath yun hai pesh-rau

Thokaron mein jis tarah se rah-guzar ka sang hai

e'tiqad-e-momin-o-kafir hai rahbar warna phir

kuchh nahin dair-o-haram mein KHak hai pasang hai

ye sada ghar ghar kare hai aasiya phir phir mudam

musht-e-gandum ke liye chhani ke upar sang hai

shaiKH ki masjid se ai 'bedar' kya hai tujh ko kaam

sajda-gah apna sanam ke aastan ka sang hai