KHak mein mujhko meri jaan mila rakkha hai

ḳhaak meñ mujh ko mirī jaan milā rakkhā hai

kyā maiñ aañsū huuñ jo nazroñ se girā rakkhā hai

ik tumhīñ ko nahīñ bechain banā rakkhā hai

arsh bhī to mire nāloñ se hilā rakkhā hai

sorish-e-hijr ne ik sīm-badan ke mujh ko

aisā phūñkā hai ki iksīr banā rakkhā hai

ik parī-vash kī ināyat ne zamāne meñ mujhe

vaqt kā apne sulaimān banā rakkhā hai

apne saaya se bhaḌak kar kahā us shoḳh ne yuuñ

mire allāh kise saath lagā rakhā hai

dil to detā huuñ mirī jaan magar ġham hai yahī

mere armānoñ ne ghar is meñ banā rakkhā hai

dil ke tālib jo huā karte haiñ āshiq se hasīñ

to unheñ husn ne ye kaam sikhā rakkhā hai

sāmne aate hue kis liye sharmāte ho

jab mirī aañkh meñ ghar tum ne banā rakkhā hai

muft dil ko mire ai barq vash ulfat hai tirī

muztarib sūrat-e-sīmāb banā rakkhā hai

terī duz-dīda nigāheñ ye pata detī haiñ

ki inhīñ choroñ ne dil merā churā rakkhā hai

maal chorī kā nahīñ jab to batā do mujh ko

tum ne kis chiiz ko muTThī meñ dabā rakkhā hai

tum ne kyuuñ dil meñ jagah dī hai butoñ ko 'sābir'

tum ne kyuuñ kaaba ko but-ḳhāna banā rakkhā hai

KHak mein mujh ko meri jaan mila rakkha hai

kya main aansu hun jo nazron se gira rakkha hai

ek tumhin ko nahin bechain bana rakkha hai

arsh bhi to mere nalon se hila rakkha hai

sorish-e-hijr ne ek sim-badan ke mujh ko

aisa phunka hai ki iksir bana rakkha hai

ek pari-wash ki inayat ne zamane mein mujhe

waqt ka apne sulaiman bana rakkha hai

apne saya se bhaDak kar kaha us shoKH ne yun

mere allah kise sath laga rakha hai

dil to deta hun meri jaan magar gham hai yahi

mere armanon ne ghar is mein bana rakkha hai

dil ke talib jo hua karte hain aashiq se hasin

to unhen husn ne ye kaam sikha rakkha hai

samne aate hue kis liye sharmate ho

jab meri aankh mein ghar tum ne bana rakkha hai

muft dil ko mere ai barq wash ulfat hai teri

muztarib surat-e-simab bana rakkha hai

teri duz-dida nigahen ye pata deti hain

ki inhin choron ne dil mera chura rakkha hai

mal chori ka nahin jab to bata do mujh ko

tum ne kis chiz ko muTThi mein daba rakkha hai

tum ne kyun dil mein jagah di hai buton ko 'sabir'

tum ne kyun kaba ko but-KHana bana rakkha hai