Khaali hathon mein mohabbat banTti rah jaungi

ḳhālī hāthoñ meñ mohabbat bāñTtī rah jā.ūñgī

apne ḳhālī haath āḳhir dekhtī rah jā.ūñgī

kuuch kar jā.eñge sab dasht-e-vafā se qāfile

ḳhvāb āñkhoñ meñ liye maiñ soī hī rah jā.ūñgī

bhuul jā.egā koī mujh ko bujhāne kā hunar

sub.h bhī aa.ī to shab bhar se jalī rah jā.ūñgī

pā.ūñgī jurm-e-mohabbat kī anokhī sī sazā

vaqt ke hoñToñ pe maiñ ik an-kahī rah jā.ūñgī

tum ne chhoḌā hai to raste aur raushan ho ga.e

tum ye samjhe the ki raste meñ khaḌī rah jā.ūñgī

vus.at-e-aflāk meñ bhī nisbat-e-zohra kahāñ

TuuT kar bhī lamha bhar kī raushnī rah jā.ūñgī

aaj sochā hai ki ḳhud raste banānā siikh luuñ

is tarah to umr saarī sochtī rah jā.ūñgī

KHali hathon mein mohabbat banTti rah jaungi

apne KHali hath aaKHir dekhti rah jaungi

kuch kar jaenge sab dasht-e-wafa se qafile

KHwab aankhon mein liye main soi hi rah jaungi

bhul jaega koi mujh ko bujhane ka hunar

subh bhi aai to shab bhar se jali rah jaungi

paungi jurm-e-mohabbat ki anokhi si saza

waqt ke honTon pe main ek an-kahi rah jaungi

tum ne chhoDa hai to raste aur raushan ho gae

tum ye samjhe the ki raste mein khaDi rah jaungi

wusat-e-aflak mein bhi nisbat-e-zohra kahan

TuT kar bhi lamha bhar ki raushni rah jaungi

aaj socha hai ki KHud raste banana sikh lun

is tarah to umr sari sochti rah jaungi