Khaali hua gilas nasha sar mein aa gaya

ḳhālī huā gilās nasha sar meñ aa gayā

dariyā utar gayā to samundar meñ aa gayā

yakjā.ī kā tilism rahā taarī TuuT kar

vo sāmne se haT ke barābar meñ aa gayā

jā kar jahāñ pe rakkhā thā honā kiyā durust

itnā sā kaam kar ke maiñ pal bhar meñ aa gayā

lekin baḌā.ī kā koī ehsās kab rahā

chakkar thā duniyā-dārī kā chakkar meñ aa gayā

aa jā ke munhasir rahā nigarānī par tamām

aksar se jā rahā kabhī aksar meñ aa gayā

yak gosha-e-vajūd meñ rakkhā qayām kuchh

bāhar baḌā fasād thā so ghar meñ aa gayā

TuuTā kahīñ se aur girā sahn meñ mire

saarā parinda yuuñ lagā is par meñ aa gayā

āvāz dūñgā saath mire aa sako to aao

thoḌā jo aur hālat-e-behtar meñ aa gayā

duniyā ke ḳhvāb dekhte guzrā tamām roz

uThte hī ḳhvāb-e-asl se daftar meñ aa gayā

jāgūñgā jab sadā-e-ulūhī sunūñgā kuchh

jānūñgā jab parinda sanobar meñ aa gayā

shāyad nazāre kī yahī be-hayyatī rahī

manzar se jaane par koī manzar meñ aa gayā

hilnā paḌe na taaki kisī rañj par mujhe

saare kā saarā maiñ kisī patthar meñ aa gayā

ḳhud ko qayām karne pe tarġhīb dūñgā maiñ

koī jo ism kal mire mantar meñ aa gayā

be-martaba bhī saañs kā lenā girāñ na thā

taqdīs kā ḳhayāl muqaddar meñ aa gayā

bāzār meñ nigāh na dil par paḌī tirī

nāyāb jins-e-dahr thā vāfar meñ aa gayā

sayyārgāñ to apnī ravish par the gāmzan

lekin 'naved' tū kahāñ chakkar meñ aa gayā

KHali hua gilas nasha sar mein aa gaya

dariya utar gaya to samundar mein aa gaya

yakjai ka tilism raha tari TuT kar

wo samne se haT ke barabar mein aa gaya

ja kar jahan pe rakkha tha hona kiya durust

itna sa kaam kar ke main pal bhar mein aa gaya

lekin baDai ka koi ehsas kab raha

chakkar tha duniya-dari ka chakkar mein aa gaya

aa ja ke munhasir raha nigarani par tamam

aksar se ja raha kabhi aksar mein aa gaya

yak gosha-e-wajud mein rakkha qayam kuchh

bahar baDa fasad tha so ghar mein aa gaya

TuTa kahin se aur gira sahn mein mere

sara parinda yun laga is par mein aa gaya

aawaz dunga sath mere aa sako to aao

thoDa jo aur haalat-e-behtar mein aa gaya

duniya ke KHwab dekhte guzra tamam roz

uThte hi KHwab-e-asl se daftar mein aa gaya

jagunga jab sada-e-uluhi sununga kuchh

jaanunga jab parinda sanobar mein aa gaya

shayad nazare ki yahi be-hayyati rahi

manzar se jaane par koi manzar mein aa gaya

hilna paDe na taki kisi ranj par mujhe

sare ka sara main kisi patthar mein aa gaya

KHud ko qayam karne pe targhib dunga main

koi jo ism kal mere mantar mein aa gaya

be-martaba bhi sans ka lena giran na tha

taqdis ka KHayal muqaddar mein aa gaya

bazar mein nigah na dil par paDi teri

nayab jins-e-dahr tha wafar mein aa gaya

sayyargan to apni rawish par the gamzan

lekin 'nawed' tu kahan chakkar mein aa gaya