KHamosh zaban se jab taqrir nikalti hai

ḳhāmosh zabāñ se jab taqrīr nikaltī hai

lagtā hai ki pairoñ se zanjīr nikaltī hai

TuuTā huā badhnā thā shāyad ki vuzū kā ho

aisī bhī to purkhoñ kī jāgīr nikaltī hai

jo daaġh hai sajde kā peshānī-e-momin par

us daaġh se ho kar hī taqdīr nikaltī hai

miltī hai ḳhushī sab ko jaise hī kahīñ se bhī

bhūlī hui bachpan kī tasvīr nikaltī hai

majrūh qalam ko jab har lafz duā de deñ

tā umr qalam se phir tahrīr nikaltī hai

ho amn yahāñ ham meñ sochā thā magar 'az.har'

dekhā to har ik ghar se shamshīr nikaltī hai

KHamosh zaban se jab taqrir nikalti hai

lagta hai ki pairon se zanjir nikalti hai

TuTa hua badhna tha shayad ki wuzu ka ho

aisi bhi to purkhon ki jagir nikalti hai

jo dagh hai sajde ka peshani-e-momin par

us dagh se ho kar hi taqdir nikalti hai

milti hai KHushi sab ko jaise hi kahin se bhi

bhuli hui bachpan ki taswir nikalti hai

majruh qalam ko jab har lafz dua de den

ta umr qalam se phir tahrir nikalti hai

ho amn yahan hum mein socha tha magar 'azhar'

dekha to har ek ghar se shamshir nikalti hai