KHabar bhi hai ye KHirad aag ke putle junun ke zer-e-asar rahe hain

ḳhabar bhī hai ye ḳhirad aag ke putle junūñ ke zer-e-asar rahe haiñ

saroñ pe sūraj uThāne vaale ḳhud apne saa.e se Dar rahe haiñ

sukūñ se marte haiñ marne vaale jinheñ ujāloñ kī hai tamannā

yahī bahut hai ki sū-e-maqtal charāġh-e-shām-o-sahar rahe haiñ

unheñ bharosa do zindagī kā jinheñ mohabbat hai zindagī se

ajal ke ham naqsh-e-pā pe chal kar fanā kī had se guzar rahe haiñ

rah-e-vafā meñ jo baḌh chuke haiñ vo paañv pīchhe na haT sakeñge

tum apne hadd-e-sitam se guzro hameñ jo karnā hai kar rahe haiñ

bajā.e zahrāb kis ne saaqī bhare haiñ amrit se jām-o-sāġhar

ki log āb-e-hayāt pī kar qazā se pahle hī mar rahe haiñ

KHabar bhi hai ye KHirad aag ke putle junun ke zer-e-asar rahe hain

saron pe suraj uThane wale KHud apne sae se Dar rahe hain

sukun se marte hain marne wale jinhen ujalon ki hai tamanna

yahi bahut hai ki su-e-maqtal charagh-e-sham-o-sahar rahe hain

unhen bharosa do zindagi ka jinhen mohabbat hai zindagi se

ajal ke hum naqsh-e-pa pe chal kar fana ki had se guzar rahe hain

rah-e-wafa mein jo baDh chuke hain wo panw pichhe na haT sakenge

tum apne hadd-e-sitam se guzro hamein jo karna hai kar rahe hain

bajae zahrab kis ne saqi bhare hain amrit se jam-o-saghar

ki log aab-e-hayat pi kar qaza se pahle hi mar rahe hain