KHabar-e-tahayyur-e-ishq sun na junun raha na pari rahi

ḳhabar-e-tahayyur-e-ishq sun na junūñ rahā na parī rahī

na to tū rahā na to maiñ rahā jo rahī so be-ḳhabarī rahī

shah-e-be-ḳhudī ne atā kiyā mujhe ab libās-e-barahnagī

na ḳhirad kī baḳhiya-garī rahī na junūñ kī parda-darī rahī

chalī samt-e-ġhaib siiñ kyā havā ki chaman zuhūr kā jal gayā

magar ek shāḳh-e-nihāl-e-ġham jise dil kaho so harī rahī

nazar-e-taġhāful-e-yār kā gila kis zabāñ siiñ bayāñ karūñ

ki sharāb-e-sad-qadah aarzū ḳhum-e-dil meñ thī so bharī rahī

vo ajab ghaḌī thī maiñ jis ghaḌī liyā dars nusḳha-e-ishq kā

ki kitāb aql kī taaq par juuñ dharī thī tyuuñ hī dharī rahī

tire josh-e-hairat-e-husn kā asar is qadar siiñ yahāñ huā

ki na aa.ine meñ rahī jilā na parī kuuñ jalvagarī rahī

kiyā ḳhaak ātish-e-ishq ne dil-e-be-navā-e-'sirāj' kuuñ

na ḳhatar rahā na hazar rahā magar ek be-ḳhatarī rahī

KHabar-e-tahayyur-e-ishq sun na junun raha na pari rahi

na to tu raha na to main raha jo rahi so be-KHabari rahi

shah-e-be-KHudi ne ata kiya mujhe ab libas-e-barahnagi

na KHirad ki baKHiya-gari rahi na junun ki parda-dari rahi

chali samt-e-ghaib sin kya hawa ki chaman zuhur ka jal gaya

magar ek shaKH-e-nihaal-e-gham jise dil kaho so hari rahi

nazar-e-taghaful-e-yar ka gila kis zaban sin bayan karun

ki sharab-e-sad-qadah aarzu KHum-e-dil mein thi so bhari rahi

wo ajab ghaDi thi main jis ghaDi liya dars nusKHa-e-ishq ka

ki kitab aql ki taq par jun dhari thi tyun hi dhari rahi

tere josh-e-hairat-e-husn ka asar is qadar sin yahan hua

ki na aaine mein rahi jila na pari kun jalwagari rahi

kiya KHak aatish-e-ishq ne dil-e-be-nawa-e-'siraj' kun

na KHatar raha na hazar raha magar ek be-KHatari rahi