KHair yunhi sahi taskin ho kahin thoDi si

ḳhair yūñhī sahī taskīñ ho kahīñ thoḌī sī

''hāñ'' to kahte ho magar saath ''nahīñ'' thoḌī sī

hāl-e-dil sun ke mirā barsar-e-rahmat to haiñ kuchh

abhī baaqī hai magar chīn-e-jabīñ thoḌī sī

huī jaatī hai sahar aisā bhī ghabrānā kyā

raat gar hai bhī to ai māh-jabīñ thoḌī sī

jām-e-mai dekh ke labrez kis andāz ke saath

us kā kahnā ki nahīñ, itnī nahīñ, thoḌī sī

be-ḳhudī ye dam-e-ruḳhsat thī ki sab kuchh bhūlā

un kī bāteñ bhī mujhe yaad rahīñ thoḌī sī

ab ye paiġhām kisī kā koī le kar jaa.e

abhī lab par hai mire jān-e-hazīñ thoḌī sī

yuuñ to tum roz hī kahte ho sabhī kuchh mujh se

aaj kī baat huī zehn-nashīñ thoḌī sī

un se kuchh kah na sakā maiñ shab-e-ġham kī bāteñ

go ki bhūlā thā magar yaad bhī thiiñ thoḌī sī

bosa to us lab-e-shīrīñ se kahāñ miltā hai

gāliyāñ bhī milīñ ham ko to milīñ thoḌī sī

ab to sab kā tire kūche hī meñ maskan Thahrā

yahī ābād hai duniyā meñ zamīñ thoḌī sī

uTThe jaate haiñ hamīñ aap na baiTheñ ḳhāmosh

aap kī baat samajhte haiñ hamīñ thoḌī sī

yaad kuchh aa ke ye hālat huī merī ki na pūchh

pichhlī ghaḌiyāñ shab-e-ġham kī jo rahīñ thoḌī sī

sub.h tak shaam se vo go ki rahe paas mire

hasrateñ dil kī magar rah hī ga.iiñ thoḌī sī

koste kyā ho abhī hote haiñ ham shādi-e-marg

gar mile dafn ko kūche meñ zamīñ thoḌī sī

sab mirā haal vahāñ kaise kahegā qāsid!

tū to suntā hai mirī baat nahīñ thoḌī sī

daulat-e-faqr se sab ho ga.ī taskīn 'nizām'

ab kareñ kyā talab-e-tāj-o-nagīñ thoḌī sī

KHair yunhi sahi taskin ho kahin thoDi si

han to kahte ho magar sath nahin thoDi si

haal-e-dil sun ke mera barsar-e-rahmat to hain kuchh

abhi baqi hai magar chin-e-jabin thoDi si

hui jati hai sahar aisa bhi ghabrana kya

raat gar hai bhi to ai mah-jabin thoDi si

jam-e-mai dekh ke labrez kis andaz ke sath

us ka kahna ki nahin, itni nahin, thoDi si

be-KHudi ye dam-e-ruKHsat thi ki sab kuchh bhula

un ki baaten bhi mujhe yaad rahin thoDi si

ab ye paigham kisi ka koi le kar jae

abhi lab par hai mere jaan-e-hazin thoDi si

yun to tum roz hi kahte ho sabhi kuchh mujh se

aaj ki baat hui zehn-nashin thoDi si

un se kuchh kah na saka main shab-e-gham ki baaten

go ki bhula tha magar yaad bhi thin thoDi si

bosa to us lab-e-shirin se kahan milta hai

galiyan bhi milin hum ko to milin thoDi si

ab to sab ka tere kuche hi mein maskan Thahra

yahi aabaad hai duniya mein zamin thoDi si

uTThe jate hain hamin aap na baiThen KHamosh

aap ki baat samajhte hain hamin thoDi si

yaad kuchh aa ke ye haalat hui meri ki na puchh

pichhli ghaDiyan shab-e-gham ki jo rahin thoDi si

subh tak sham se wo go ki rahe pas mere

hasraten dil ki magar rah hi gain thoDi si

koste kya ho abhi hote hain hum shadi-e-marg

gar mile dafn ko kuche mein zamin thoDi si

sab mera haal wahan kaise kahega qasid!

tu to sunta hai meri baat nahin thoDi si

daulat-e-faqr se sab ho gai taskin 'nizam'

ab karen kya talab-e-taj-o-nagin thoDi si