KHirad mein mubtila hai salik diwana barson se

ḳhirad meñ mubtilā hai 'sālik' dīvāna barsoñ se

nahīñ aayā vo mai-ḳhāne meñ bebākāna barsoñ se

mayassar jis se aa jaatī thī saaqī kī qadam-bosī

muqaddar meñ nahīñ vo laġhzish-e-mastāna barsoñ se

ba-yād-e-chashm-e-yār ik nāra-e-mastāna ai saaqī

ki haao hū se ḳhālī hai tirā mai-ḳhāna barsoñ se

tujhe kuchh ishq o ulfat ke sivā bhī yaad hai ai dil

sunā.e jā rahā hai ek hī afsāna barsoñ se

kisī ko to musharraf kar de ai zauq-e-jabīñ-sā.ī

taqāzā kar rahe haiñ kaaba o but-ḳhāna barsoñ se

na.ī sham.eñ jalāo āshiqī kī anjuman vaalo

ki suunā hai shabistān-e-dil-e-parvāna barsoñ se

koī jauhar-shanās aa.e to jaane qadar 'sālik' kī

paḌā hai ḳhaak par ye gauhar-e-yak-dāna barsoñ se

KHirad mein mubtila hai 'salik' diwana barson se

nahin aaya wo mai-KHane mein bebakana barson se

mayassar jis se aa jati thi saqi ki qadam-bosi

muqaddar mein nahin wo laghzish-e-mastana barson se

ba-yaad-e-chashm-e-yar ek nara-e-mastana ai saqi

ki hao hu se KHali hai tera mai-KHana barson se

tujhe kuchh ishq o ulfat ke siwa bhi yaad hai ai dil

sunae ja raha hai ek hi afsana barson se

kisi ko to musharraf kar de ai zauq-e-jabin-sai

taqaza kar rahe hain kaba o but-KHana barson se

nai shamen jalao aashiqi ki anjuman walo

ki suna hai shabistan-e-dil-e-parwana barson se

koi jauhar-shanas aae to jaane qadar 'salik' ki

paDa hai KHak par ye gauhar-e-yak-dana barson se