KHizan ki zard si rangat badal bhi sakti hai

ḳhizāñ kī zard sī rañgat badal bhī saktī hai

bahār aane kī sūrat nikal bhī saktī hai

jalā ke sham.a ab uTh uTh ke dekhnā chhoḌo

vo zimmedārī se az-ḳhud pighal bhī saktī hai

hai shart sub.h ke raste se ho ke shaam aa.e

to raat us ko sahar meñ badal bhī saktī hai

zarā sañbhal ke jalānā aqīdatoñ ke charāġh

bhaḌak na jaa.eñ ki masnad ye jal bhī saktī hai

abhī to chaak pe jaarī hai raqs miTTī kā

abhī kumhār kī niyyat badal bhī saktī hai

ye āftāb se kah do ki fāsla rakkhe

tapish se barf kī dīvār gal bhī saktī hai

tire na aane kī tashrīh kuchh zarūrī nahīñ

ki tere aate hī duniyā badal bhī saktī hai

koī zarūrī nahīñ vo hī dil ko shaad kare

'alīnā' aap tabī.at bahal bhī saktī hai

KHizan ki zard si rangat badal bhi sakti hai

bahaar aane ki surat nikal bhi sakti hai

jala ke shama ab uTh uTh ke dekhna chhoDo

wo zimmedari se az-KHud pighal bhi sakti hai

hai shart subh ke raste se ho ke sham aae

to raat us ko sahar mein badal bhi sakti hai

zara sanbhal ke jalana aqidaton ke charagh

bhaDak na jaen ki masnad ye jal bhi sakti hai

abhi to chaak pe jari hai raqs miTTi ka

abhi kumhaar ki niyyat badal bhi sakti hai

ye aaftab se kah do ki fasla rakkhe

tapish se barf ki diwar gal bhi sakti hai

tere na aane ki tashrih kuchh zaruri nahin

ki tere aate hi duniya badal bhi sakti hai

koi zaruri nahin wo hi dil ko shad kare

'alina' aap tabiat bahal bhi sakti hai