KHud masiha KHud hi qatil hain to wo bhi kya karen

ḳhud masīhā ḳhud hī qātil haiñ to vo bhī kyā kareñ

zaḳhm paidā kareñ yā zaḳhm-e-dil achchhā kareñ

dil rahe ālūda-dāman aur ham dekhā kareñ

aaj ai ashk-e-nadāmat aa tujhe dariyā kareñ

jism-e-āzādi meñ phūñkī tū ne majbūrī kī ruuh

ḳhair jo chāhā kiyā ab ye batā ham kyā kareñ

ḳhuun ke chhīñToñ se kuchh phūloñ ke ḳhāke hī sahī

mausam-e-gul aa gayā zindāñ meñ baiThe kyā kareñ

jā-ba-jā taġhiyi-e-hāl-e-dil ke charche haiñ to hoñ

ham hue rusvā magar ab ham kise rusvā kareñ

haañ nahīñ shart-e-muravvat hasrat-e-tāsīr-e-dard

rahm aa hī jā.egā un se taqāzā kyā kareñ

shauq-e-nazzāra salāmat hai to dekhā jā.egā

un ko parda hī agar manzūr hai pardā kareñ

zarf vīrāna ba-qadr-e-himmat-e-vehshat nahīñ

laao har zarre meñ paidā vus.at-e-sahrā kareñ

marg-e-be-hañgām 'fānī' vaj.h-e-taskīñ ho chukī

zindagī se aap ghabrāte haiñ ghabrāyā kareñ

KHud masiha KHud hi qatil hain to wo bhi kya karen

zaKHm paida karen ya zaKHm-e-dil achchha karen

dil rahe aaluda-daman aur hum dekha karen

aaj ai ashk-e-nadamat aa tujhe dariya karen

jism-e-azadi mein phunki tu ne majburi ki ruh

KHair jo chaha kiya ab ye bata hum kya karen

KHun ke chhinTon se kuchh phulon ke KHake hi sahi

mausam-e-gul aa gaya zindan mein baiThe kya karen

ja-ba-ja taghiyi-e-haal-e-dil ke charche hain to hon

hum hue ruswa magar ab hum kise ruswa karen

han nahin shart-e-murawwat hasrat-e-tasir-e-dard

rahm aa hi jaega un se taqaza kya karen

shauq-e-nazzara salamat hai to dekha jaega

un ko parda hi agar manzur hai parda karen

zarf virana ba-qadr-e-himmat-e-wehshat nahin

lao har zarre mein paida wusat-e-sahra karen

marg-e-be-hangam 'fani' wajh-e-taskin ho chuki

zindagi se aap ghabraate hain ghabraya karen