KHuda ka shukr hai girdab se nikal aaya

ḳhudā kā shukr hai girdāb se nikal aayā

maiñ us ke halqa-e-ahbāb se nikal aayā

sajī huī thiiñ dukāneñ munāfiqat kī jahāñ

maiñ aise qarya-e-be-ḳhvāb se nikal aayā

bahut dinoñ se hisār-e-tilism-e-ḳhvāb meñ thā

tilism TuuT gayā ḳhvāb se nikal aayā

atā huī hai mohabbat kī saltanat jab se

maiñ shahr-e-dīda-e-ḳhūñ-nāb se nikal aayā

kabhī gulāb se aane lagī mahak us kī

kabhī vo anjum o mahtāb se nikal aayā

anā kī naav jahāñ Doltī phire 'mahbūb'

maiñ us fareb ke sailāb se nikal aayā

KHuda ka shukr hai girdab se nikal aaya

main us ke halqa-e-ahbab se nikal aaya

saji hui thin dukanen munafiqat ki jahan

main aise qarya-e-be-KHwab se nikal aaya

bahut dinon se hisar-e-tilism-e-KHwab mein tha

tilism TuT gaya KHwab se nikal aaya

ata hui hai mohabbat ki saltanat jab se

main shahr-e-dida-e-KHun-nab se nikal aaya

kabhi gulab se aane lagi mahak us ki

kabhi wo anjum o mahtab se nikal aaya

ana ki naw jahan Dolti phire 'mahbub'

main us fareb ke sailab se nikal aaya