kin dushmanon ka tir banaya gaya hun main

kin dushmanoñ kā tiir banāyā gayā huuñ maiñ

apne hī jism-o-jāñ meñ utārā gayā huuñ maiñ

jo sab se kaT chukā huuñ to hairat kī baat kyā

ab apne saath bhī kahāñ paayā gayā huuñ maiñ

ik umr tak to maiñ bhī zamāne ke saath thā

kuchh baat hai jo lauT ke ghar aa gayā huuñ maiñ

vo māh-vash sunā hai ki guzregā is taraf

ik kahkashāñ sī raah meñ bikhrā gayā huuñ maiñ

ḳhud apne-āp se bhī kahāñ thā maiñ mutma.in

ab jo zamāne tujh ko bhī raas aa gayā huuñ maiñ

ik sāneha sā dafn huuñ lekin kabhī kabhī

sadiyoñ kī qabr se bhī uThāyā gayā huuñ maiñ

ab kis tarah maiñ apne laboñ ko sameT luuñ

kin āñdhiyoñ kī zad pe chalāyā gayā huuñ maiñ

kin dushmanon ka tir banaya gaya hun main

apne hi jism-o-jaan mein utara gaya hun main

jo sab se kaT chuka hun to hairat ki baat kya

ab apne sath bhi kahan paya gaya hun main

ek umr tak to main bhi zamane ke sath tha

kuchh baat hai jo lauT ke ghar aa gaya hun main

wo mah-wash suna hai ki guzrega is taraf

ek kahkashan si rah mein bikhra gaya hun main

KHud apne-ap se bhi kahan tha main mutmain

ab jo zamane tujh ko bhi ras aa gaya hun main

ek saneha sa dafn hun lekin kabhi kabhi

sadiyon ki qabr se bhi uThaya gaya hun main

ab kis tarah main apne labon ko sameT lun

kin aandhiyon ki zad pe chalaya gaya hun main