kis ka bhed kahan ki qismat pagle kis janjal mein hai

kis kā bhed kahāñ kī qismat pagle kis janjāl meñ hai

baazī hai ik sāda-kāġhaz saarā kartab chaal meñ hai

ek raheñ yā do ho jaa.eñ rusvā.ī har haal meñ hai

jīvan ruup kī saarī shobhā jīvan ke janjāl meñ hai

tujh se bichhaḌ kar tujh se mil kar donoñ mausam dekh liye

baat jahāñ thī ab bhī vahīñ hai farq zarā sā haal meñ hai

āḳhir uuprī hamdardī ko rañg to ik din laanā thā

baat thī pahle chand gharoñ tak ab duniyā bhauñchāl meñ hai

tum apnī āñkhoñ kī laalī phūloñ meñ taqsīm karo

mere dil kā haal na pūchho rahne do jis haal meñ hai

jīvan bhedan kī chintā chhoḌo aao kuchh is par baat kareñ

ham dhartī ke phande meñ haiñ dhartī kis ke jaal meñ hai

'anjum' pyaar jise kahte haiñ us ke Dhañg nyāre haiñ

chup meñ hai sukh chain na koī rāhat qīl-o-qāl meñ hai

kis ka bhed kahan ki qismat pagle kis janjal mein hai

bazi hai ek sada-kaghaz sara kartab chaal mein hai

ek rahen ya do ho jaen ruswai har haal mein hai

jiwan rup ki sari shobha jiwan ke janjal mein hai

tujh se bichhaD kar tujh se mil kar donon mausam dekh liye

baat jahan thi ab bhi wahin hai farq zara sa haal mein hai

aaKHir upri hamdardi ko rang to ek din lana tha

baat thi pahle chand gharon tak ab duniya bhaunchaal mein hai

tum apni aankhon ki lali phulon mein taqsim karo

mere dil ka haal na puchho rahne do jis haal mein hai

jiwan bhedan ki chinta chhoDo aao kuchh is par baat karen

hum dharti ke phande mein hain dharti kis ke jal mein hai

'anjum' pyar jise kahte hain us ke Dhang nyare hain

chup mein hai sukh chain na koi rahat qil-o-qal mein hai