kis ne kaha ki chup hun miyan bolta nahin

kis ne kahā ki chup huuñ miyāñ boltā nahīñ

jab aag boltī ho dhuāñ boltā nahīñ

raste kī baat ġhaur se suntā huuñ is liye

rah meñ kisī se ham-safarāñ boltā nahīñ

yuuñ to har ek shaḳhs kā apnā hī shor hai

lekin kisī se koī yahāñ boltā nahīñ

bas yūñhī pūchhtā huuñ makīnoñ kā hāl-chāl

barsoñ se band hai ye makāñ boltā nahīñ

sar khā liyā hai dil ne mirā bol bol kar

kahtā huuñ maiñ jahāñ pe vahāñ boltā nahīñ

kitnī hī dāstāneñ sunātā hai lahr lahr

kahne ko yuuñ to āb-e-ravāñ boltā nahīñ

dil meñ utartā jaatā hai us kā kahā huā

chāhe vo shaḳhs merī zabāñ boltā nahīñ

kis ne kaha ki chup hun miyan bolta nahin

jab aag bolti ho dhuan bolta nahin

raste ki baat ghaur se sunta hun is liye

rah mein kisi se ham-safaran bolta nahin

yun to har ek shaKHs ka apna hi shor hai

lekin kisi se koi yahan bolta nahin

bas yunhi puchhta hun makinon ka haal-chaal

barson se band hai ye makan bolta nahin

sar kha liya hai dil ne mera bol bol kar

kahta hun main jahan pe wahan bolta nahin

kitni hi dastanen sunata hai lahr lahr

kahne ko yun to aab-e-rawan bolta nahin

dil mein utarta jata hai us ka kaha hua

chahe wo shaKHs meri zaban bolta nahin