kisi bhi zaKHm ka dil par asar na tha koi

kisī bhī zaḳhm kā dil par asar na thā koī

ye baat jab kī hai jab chāra-gar na thā koī

kisī se rañg-e-ufuq hī kī baat kar lete

ab is qadar bhī yahāñ mo'tabar na thā koī

banā.e jā.ūñ kisī aur ke bhī naqsh-e-qadam

ye kyuuñ kahūñ ki mirā ham-safar na thā koī

guzar ga.e tire kūche se ajnabī kī tarah

ki ham se silsila-e-bām-o-dar na thā koī

jise guzār ga.e ham baḌe hunar ke saath

vo zindagī thī hamārī hunar na thā koī

ajiib hote haiñ ādāb-e-ruḳhsat-e-mahfil

ki uTh ke vo bhī chalā jis kā ghar na thā koī

hujūm-e-shahr meñ shāmil rahā aur is ke ba.ad

'sahar' udhar bhī gayā maiñ jidhar na thā koī

kisi bhi zaKHm ka dil par asar na tha koi

ye baat jab ki hai jab chaara-gar na tha koi

kisi se rang-e-ufuq hi ki baat kar lete

ab is qadar bhi yahan mo'tabar na tha koi

banae jaun kisi aur ke bhi naqsh-e-qadam

ye kyun kahun ki mera ham-safar na tha koi

guzar gae tere kuche se ajnabi ki tarah

ki hum se silsila-e-baam-o-dar na tha koi

jise guzar gae hum baDe hunar ke sath

wo zindagi thi hamari hunar na tha koi

ajib hote hain aadab-e-ruKHsat-e-mahfil

ki uTh ke wo bhi chala jis ka ghar na tha koi

hujum-e-shahr mein shamil raha aur is ke baad

'sahar' udhar bhi gaya main jidhar na tha koi