kisi jhuTi wafa se dil ko bahlana nahin aata

kisī jhūTī vafā se dil ko bahlānā nahīñ aatā

mujhe ghar kāġhazī phūloñ se mahkānā nahīñ aatā

maiñ jo kuchh huuñ vahī kuchh huuñ jo zāhir hai vo bātin hai

mujhe jhūTe dar-o-dīvār chamkānā nahīñ aatā

maiñ dariyā huuñ magar bahtā huuñ maiñ kohsār kī jānib

mujhe duniyā kī pastī meñ utar jaanā nahīñ aatā

zar-o-māl-o-javāhir le bhī aur Thukrā bhī saktā huuñ

koī dil pesh kartā ho to Thukrānā nahīñ aatā

parinda jānib-e-dāna hamesha uḌ ke aatā hai

parinde kī taraf uḌ kar kabhī daana nahīñ aatā

agar sahrā meñ haiñ to aap ḳhud aa.e haiñ sahrā meñ

kisī ke ghar to chal kar koī vīrāna nahīñ aatā

huā hai jo sadā us ko nasīboñ kā likhā samjhā

'adīm' apne kiye par mujh ko pachhtānā nahīñ aatā

kisi jhuTi wafa se dil ko bahlana nahin aata

mujhe ghar kaghazi phulon se mahkana nahin aata

main jo kuchh hun wahi kuchh hun jo zahir hai wo baatin hai

mujhe jhuTe dar-o-diwar chamkana nahin aata

main dariya hun magar bahta hun main kohsar ki jaanib

mujhe duniya ki pasti mein utar jaana nahin aata

zar-o-mal-o-jawahir le bhi aur Thukra bhi sakta hun

koi dil pesh karta ho to Thukrana nahin aata

parinda jaanib-e-dana hamesha uD ke aata hai

parinde ki taraf uD kar kabhi dana nahin aata

agar sahra mein hain to aap KHud aae hain sahra mein

kisi ke ghar to chal kar koi virana nahin aata

hua hai jo sada us ko nasibon ka likha samjha

'adim' apne kiye par mujh ko pachhtana nahin aata