kisi ka dil ko raha intizar sari raat

kisī kā dil ko rahā intizār saarī raat

falak ko dekhā kiye baar baar saarī raat

taḌap taḌap ke tamannā meñ karvaTeñ badlīñ

na paayā dil ne hamāre qarār saarī raat

idhar to sham.a thī giryāñ udhar the ham giryāñ

isī tarah pe rahe ashk-bār saarī raat

ḳhayāl-e-sham-ruḳh-e-yār meñ jale tā-sub.h

liyā qarār na parvāna-vār saarī raat

na pūchh soz-e-judā.ī ko ham se ai hamdam

jalā kiyā ye dil-e-dāġhdār saarī raat

mizha ke ishq se aa.ī na niiñd āñkhoñ meñ

nazar khaTaktī rahī ban ke ḳhaar saarī raat

ḳhayāl-e-zulf-e-siyah meñ bahā kiye aañsū

bañdhā rahā mire rone kā taar saarī raat

na pūchh ham se 'asar' raat kis tarah kaaTī

ajab tarah kā rahā intishār saarī raat

kisi ka dil ko raha intizar sari raat

falak ko dekha kiye bar bar sari raat

taDap taDap ke tamanna mein karwaTen badlin

na paya dil ne hamare qarar sari raat

idhar to shama thi giryan udhar the hum giryan

isi tarah pe rahe ashk-bar sari raat

KHayal-e-sham-ruKH-e-yar mein jale ta-subh

liya qarar na parwana-war sari raat

na puchh soz-e-judai ko hum se ai hamdam

jala kiya ye dil-e-daghdar sari raat

mizha ke ishq se aai na nind aankhon mein

nazar khaTakti rahi ban ke KHar sari raat

KHayal-e-zulf-e-siyah mein baha kiye aansu

bandha raha mere rone ka tar sari raat

na puchh hum se 'asar' raat kis tarah kaTi

ajab tarah ka raha intishaar sari raat