kisi ke dosh na markab se istifada kiya

kisī ke dosh na markab se istifāda kiyā

yahāñ talak kā safar ham ne pā-pyāda kiyā

jahāñ pe dekhe qadam apne kuchh bhaTakte hue

vahīñ Thahar ke farozāñ charāġh-e-bāda kiyā

libās badle nahīñ ham ne mausamoñ kī tarah

ki zeb-e-tan jo kiyā ek hī labāda kiyā

amīr-e-shahr sabhī the sharīk-e-mashq-e-sitam

kisī ne kam to kisī ne sitam ziyāda kiyā

har ek baar qadam but-kade meñ lauT aa.e

ḳhudā gavāh hai masjid kā jab irāda kiyā

bichhaḌne vāloñ meñ ham jis se āshnā kam the

na jaane dil ne use yaad kyuuñ ziyāda kiyā

koī akelā to maiñ sādgī-pasand na thā

pasand us ne bhī rañgoñ meñ rañg saada kiyā

bahut hī tañg thī 'mohsin' ye rahguzār-e-ġhazal

ham ahle-e-fikr-o-nazar ne ise kushāda kiyā

kisi ke dosh na markab se istifada kiya

yahan talak ka safar hum ne pa-pyaada kiya

jahan pe dekhe qadam apne kuchh bhaTakte hue

wahin Thahar ke farozan charagh-e-baada kiya

libas badle nahin hum ne mausamon ki tarah

ki zeb-e-tan jo kiya ek hi labaada kiya

amir-e-shahr sabhi the sharik-e-mashq-e-sitam

kisi ne kam to kisi ne sitam ziyaada kiya

har ek bar qadam but-kade mein lauT aae

KHuda gawah hai masjid ka jab irada kiya

bichhaDne walon mein hum jis se aashna kam the

na jaane dil ne use yaad kyun ziyaada kiya

koi akela to main sadgi-pasand na tha

pasand us ne bhi rangon mein rang sada kiya

bahut hi tang thi 'mohsin' ye rahguzar-e-ghazal

hum ahle-e-fikr-o-nazar ne ise kushada kiya